ედუარდ ნეგრებეცკი (1908-1985)

დაიბადა თბილისში (24.11.1908). 30-50 წლებში სსრ კავშირის ერთ-ერთი უძლიერესი ჩოგბურთელი იყო. სპორტის დამსახურებული ოსტატი (1948). 1954-1960 წლებში სსრ კავშირის ნაკრების მთავარი მწვრთნელი. 1960 წლიდან ლენინგრადის ნაკრების მთავარი მწვრთნელი. დაამთავრა ლესგაფთის სახელობის ფიზკულტურისა და სპორტის ინსტიტუტი და მუსიკალური ტექნიკუმი. სწავლობდა ლენინგრადის კონსერვატორიაში ვოკალის ფაკულტეტზე.
ჩოგბურთის თამაში დაიწყო 12 წლის ასაკში ცნობილ მწვრთნელთან იან ჰომერთან. 1922-1926 წლებში თბილისის ჩემპიონი მე-2 თანრიგოსნებში. 1927 ამიერკავკასიის რესპუბლიკების ჩემპიონი გახდა. 1928 წლის სსრ კავშირის სპარტაკიადაზე საქართველოს ნაკრები გუნდის შემადგენლობაში მე-2 ადგილი დაიკავა. პირად პირველობაზე კი 1/4 ფინალს მიაღწია. 1932 წლიდან ლენინგრადში ცხოვრობდა.
1932 წელს ერთეულთა თანრიგში პირველად გახდა საბჭოთა კავშირის ჩემპიონი. ეს მიღწევა ე.ნეგრებეცკიმ 1947, 1949 და 1950 წლებში გაიმეორა. არჩილ მდივანთან ერთად 1934-1936 წლებში სსრ კავშირის ჩემპიონია წყვილებში. სხავადასხვა პარტნიორებთან ე. ნეგრებეცკი სსრ კავშერის ჩემპიონია წყვილთა თანრიგში (1934-1940, 1950-1952) და შერეულ წყვილებში (1938-1939, 1947, 1950-1952).* 1931-1953 წლებში ე. ნეგრებეცკი საბჭოთა კავშირის უძლიერეს ათეულში შედიოდა. საერთაშორისო მატჩების მონაწილეა თურქეთთან(1935), ჩეხოსლოვაკიასთან (1937-1938,1949), იუგოსლავიასთან(1946), უნგრეთთან(1949) და პოლონეთთან. 1937-1938 წლებში ანრი კოშეს ცნობილ სკოლაში სწავლობდა.
ათლეტური აღნაგობის, ფიზიკურად კარგად მომზადებული, ედუარდ ნეგრებეცკი კომბინაციურ ჩოგბურთს თამაშობდა. მძლავრი ჩაწოდება, ბრწყინვალე დარტყმა მარჯვნიდან, კარგი თამაში ჰაერიდან და უნიკალური სმეში. აი, ე. ნეგრებეცკის თამაშის ძირითადი კოზირები. ედუარდ ნეგრებეცკი გარდაიცვალა 1985 წელს 30 იანვარს სანქთ-პეტერბურგში.

* წყვილთა თანრიგში 1937-1940 წლებში ე. ნეგრებეცკის პარტნიორი იყო სსრ კავშირის მრავალგზის ჩემპიონი ევგენი კუდრიავცევი, 1950-1952 წლებში კი _ ნიკოლაი ოზეროვი.
* შერეულ წყვილთა თანრიგში 1938-1939 წლებში ე. ნეგრებეცკის პარტნიორი იყო ზინაიდა კლოჩკოვა, 1950-1952 წლებში კი _ სპორტის დამსახურებული ოსტატი ტატიანა ნალიმოვა იყო.
 

Home Up